Espéranto-France

Nova logotipo por Espéranto-France

2026-10-07T12:48:51Z

La ĝisnuna logotipo de Espéranto-France estis proponita en 1995. Ĝi fakte unue estis kreita por Espéranto-Jeunes, sed tuj poste ankaŭ estis adoptita de Espéranto-France. 30 jarojn poste, venis la tempo aktualigi la bildon de niaj asocioj post diversaj rimarkoj de junuloj kiuj estis kritikaj.

Eble iuj el vi memoras pri la ĝenerala uzado de la verda koloro kaj de la stelo en ĉiuj dokumentoj disdonitaj aŭ afiŝitaj de esperantistoj en Francio ĝis la jaroj 90. Eĉ ofte la verda estis nur la koloro de la papero nigre presita… Sed la tiamaj membroj de JEFO (Espéranto-Jeunes) sopiris pri pli moderna bildo por vivanta lingvo kiel Esperanto. Membro de JEFO laboranta pri informado proponis pli allogan flugfolion kaj bildon kun kiso. La bildo furoris tiam, sed la logotipo ne ŝanĝiĝis. Poste, junaj germanoj de GEJ eldonis buntan modernan flugfolion por varbi por Esperanto. Tuj venis la ideo traduki ĝin de la germana al la franca kaj eldoni ĝin ankaŭ niaflanke, sed… Malgraŭ la moderneco, francaj junuloj tamen trovis, ke necesos adapti kelkajn kolorojn kaj ilustraĵojn al la franca kulturo… Grupo laboris pri ideoj de enhavo kaj de nova slogano “le Monde au bout de la langue”. Kaj eks-kolegino de mi, grafikistino, proponis kaj novan logotipon kaj tutan bildon kun 4 koloroj (plej ofte uzataj en la flagoj de la landoj), desegnaĵo de Tero kun esperantaj tekstoj eltranĉitaj de la revuo Kontakto kaj enpaĝigado de la flugfolio. La tuton senpage.

JEFO eldonis tiun unuan tute koloran flugfolion kaj poste UFE (Espéranto-France) adoptis la bildon kaj produktis la sekvajn eldonojn de la flugfolio.
Kelkajn jarojn poste okazis malgranda evoluo de la logotipo por mildigi la angulojn de la formoj malantaŭ la literoj de “espéranto” kaj la slogano evoluis al “la langue équitable”. Sed la koncepto restis la sama kaj ni bezonis novan pripensadon de la komenco.

La laboro komenciĝis en 2024 kun alvoko por proponoj de profesiaj grafikistoj. Iuj proponoj alvenis malrapide sed ni kompletigis iom post iom kolekton de proponoj por prezento al la komitato de Espéranto-France la 19an de oktobro 2025. 12 proponoj estis debatitaj kaj nur 4 elektitaj de la komitatanoj por pli larĝa voĉdonado de la membroj. En novembro venis 209 voĉdonoj kiuj elektis la novan logotipon, ankaŭ plej ŝatatan de plimulto de la komitatanoj. Tamen, tiu balotado alportis kelkajn kromajn proponojn. Ĉar nia logotipo ne tiom celas esperantistojn kiom ne-membrojn, estis decidite organizi lastan baloton kun la novaj proponoj kaj la aktuala logotipo al la ricevantoj de Esperanto-Aktiv', kiuj plejmulte ne estas membroj. Tiu nova baloto kun 233 voĉdonantoj denove konfirmis la elekton de la nova logotipo.

Tiuj etapoj montras la amplekson de la konsultado de ĉiuj por certigi ke ni ne eraras. La nova logotipo estis kreita de Emmanuelle Richard, sperta grafikistino, kiu ankaŭ enpaĝigas la revuon Le Monde de l'Espéranto de kelkaj jaroj. Dankon kaj gratulon al ŝi !

Mi deziras longan vivon al ĉi tiu nova bildo por nia asocio, jam uzata de lokaj asocioj, kiuj tuj decidis ankaŭ modernigi sian bildon surbaze de tiu desegnaĵo (Nord-Francio, Provenco, Strasburgo, Parizo-Francilio…). Ĝi ja disponeblas por ĉiu loka aŭ faka asocio kiu deziras uzi ĝin, eĉ por aliaj landaj asocioj, kiuj kreis siajn logotipojn surbaze de la franca (Italio, Kroatio…).

Bruno Flochon

Kalendaretoj

2026-09-21T16:00:00Z

✓ La kalendaretoj 2027 estas disponeblaj !
Tiuj kalendaretoj, vizitkartograndaj, estas efikaj por reklami pri Esperanto.

La kolora, bunta aspekto donas pozitivan impreson pri Esperanto. Per sia juneca stilo, ĝi estas tute taŭga por junuloj, ekzemple por amase disdoni en liceoj aŭ universitatoj, sed ankaŭ en foiroj kaj bazaroj.

Homoj ofte petas pliajn informojn, do la kalendareto estas ideala reklamilo por la unua kontakto !

Ĝi havas la avantaĝojn jenajn : faldebla, enhavanta prezenteton de la Esperanta gramatiko, kaj oftajn frazojn, kiujn la ricevantoj povas analizi kaj elparoli, kaj kiuj tiklas ilian scivolemon ; fine, ĝi estas senpaga por la disdonantoj !

Se vi deziras ricevi kelkajn centojn (200 ? 500 ? 1000 aŭ pli ?) por helpi disdoni ilin, bonvolu skribi en Esperanto al : info@esperanto-france.org
Profitu la okazon por mendi librojn !

Ili estas mendeblaj en nia reta butiko :
https://butiko-esperanto-france.org/petit-materiel/1653-kalendaretoj-2027.html

Se vi deziras plian informon, ne hezitu skribi al ni !

Internacia Tago de Paco, la 21-a de septembro 2026

2026-09-20T14:05:26Z

La Internacia Paca Tago memorigas nin pri nia kolektiva engaĝiĝo por neperforto, kunlaboro kaj konstruado de pli justaj kaj egalecaj socioj. Paco konstruiĝas en internaciaj interkonsentoj, sed ankaŭ en klasĉambroj, komunumoj, familioj, laborejoj....

Packonstruado komenciĝas per malferma dialogo, por krei fidon kaj starigi principojn de justeco kondukantajn al repaciĝo kaj rekonstruado de tio, kio estis detruita. Ĝi ankaŭ signifas serĉi komunan bazon por trakti komunajn problemojn. Per dialogo, se ni tiel volas, ni povas ŝanĝi diferencojn en kunlaboron, kaj streĉiĝon en fidon.

Por atingi tiun celon, la lingva dimensio estas tre grava. En vera dialogo, ĉiuj partioj estas aŭdataj, rekonataj kaj komprenataj, sendepende de prestiĝo aŭ potenco aŭ denaska lingvo. Certigi, ke homoj povas esprimi sin, lerni, partopreni en la publika vivo, kaj konservi siajn lingvojn kaj tradiciojn – tio estas rekoni la homan dignon kaj rajton esti parto de la kolektiva konstruado de socio.

Jam de 1908, Universala Esperanto-Asocio laboras per la unueciga rimedo de la Internacia Lingvo Esperanto, por konstrui pacon, proksimigante homojn el la tuta mondo en forta sento de solidareco kaj interkompreno. En la 111-a Universala Kongreso de Esperanto, okazinta en Graz, Aŭstrio, de la 1-a ĝis la 8-a de aŭgusto 2026, la kunvenintaj esperantistoj, en sia konkluda rezolucio, bedaŭris «la nunan tendencon al repolusigo de la mondo en influzonojn, kiuj favoras mensogojn, timigadon kaj solvon de malekvilibroj per forto kaj milito, anstataŭ per dialogo kaj respekto al internacia juro».

La kongresanoj ankaŭ esprimis “sian subtenon al la centra rolo de Unuiĝintaj Nacioj en la kunordigado de internacia kunlaboro por daŭripova evoluigo, kaj instigis la membroŝtatojn [de UN] provizi al ĝi la necesajn rimedojn, kompetentojn kaj politikan subtenon por efike plenumi tiun rolon".

Inspirite de la Esperanta idealo kunigi popolojn kaj homojn en senpera dialogo, ni laboros, partnere kun Unuiĝintaj Nacioj kaj Unesko, por konstrui daŭran pacon inter ĉiuj homoj de la mondo.

Eŭropa kongreso de Esperanto en majo 2027

2026-05-27T15:01:32Z

La Eŭropa Esperanta Kongreso okazos de la 14-a ĝis la 17-a de majo 207 en Carry-le-Rouet, proksime de Marsejlo en Provenco.

Pliaj informoj estas haveblaj en la kongresa retejo : https://kongreso2027.esperanto-france.org

Verkoj de Lukiano

2026-05-16T19:47:00Z

Malkovru la satiran kaj fantazian universon de Lukiano, majstro de ironio kaj antikva antaŭulo de sciencfikcio !
Ĉi tiu esperantlingva eldono, tradukita de Gerrit Berveling, kunigas sentempajn tekstojn, en kiuj dioj, herooj kaj filozofoj interrilatas en dialogoj tiel spritaj kiel subfosaj.

Tiu libro estas parto de la serio Oriento-Okcidento de UEA.

Ĝi estas aĉetebla ĉe https://butiko-esperanto-france.org/romans-nouvelles-recits-traductions/1615-verkoj-de-lukiano.html
kaj ĉe https://www.lulu.com/spotlight/esperanto-france
kaj en la sidejo de la asocio.

356 pages • format A5 (148 x 210 mm)
978-2-494261-06-8
leĝa depono : 2026

Novaj eldonoj de Espéranto-France (2026)

2026-05-16T19:34:49Z

Espéranto-France prezentas siajn librojn publikitajn en 2026 :
• Legu min ie ajn, de Laure Patas d'Illiers
• Paradizo, de Said Baluĉi
• Verkoj de Lukiano

Legu min ie ajn, de Laure Patas d'Illiers

Legu min ie ajn estas novelaro de 30 noveloj, esperante verkitaj de Laure Patas d'Illiers.

Estas libro por vi, kara leganto. Legu min kie vi vivas en la mondo.
Legu min kie ajn vi sentas vin komforta : en lito, en banujo, sur arbobranĉo, en boato, sur neceseja seĝo.
Malfermu min, elektu unu el la 30 noveloj.
Komence estas mikronoveloj, poste la noveloj pli kaj pli longas.
La temoj estas diversaj. Kelkaj noveloj estas amuzaj, aliaj kortuŝaj.
Legu min !

Legu min ie ajn estas aĉetebla en nia butiko : https://butiko-esperanto-france.org/litterature-originale-en-esperanto/1616-legu-min-ie-ajn.html
kaj ankaŭ ĉe https://www.lulu.com/spotlight/esperanto-france

Paradizo, de Said Baluĉi

En Amsterdamo, Kamjar atendas sian ĝemelan fraton Kuhjar post kvar jardekoj da disiĝo. Sed Kuhjar ne aperas. Anstataŭ li venas mesaĝo :
Eskapi el nia paradizo ne eblas.
La reĝimo en Irano postulas elaĉeton kaj la falsadon de ĉiuj iliaj leteroj. Kamjar devas transformi la voĉon de sia frato en laŭdojn al la islama respubliko. Ĉiu mensogo estas turmento, sed la vivo de Kuhjar dependas de ĝi.

Paradizo estas rakonto pri ekzilo, memoro kaj la nevenkebla ligo inter fratoj, kiu montras kiel espero povas supervivi eĉ en la ombro de diktaturo.

Legu eltiraĵon : Paradizo

Paradizo estas aĉetebla en nia butiko : https://butiko-esperanto-france.org/litterature-originale-en-esperanto/1617-paradizo.html
kaj ankaŭ ĉe https://www.lulu.com/spotlight/esperanto-france

Verkoj de Lukiano

Pri kio parolas la dioj inter siaj konversacioj, for de homoj ?
Kial malamikas la loĝantoj de Luno kontraŭ la loĝantoj de Suno kaj per kiaj militiloj ili batalas inter si ?
Ĉu la matena stelo estas loĝata ?
Kial Homero nomiĝis Tigrano ?
Ĉu fidi la historiojn de Herodoto ?

La Verkoj de Lukiano impresis multajn verkistojn tra la jarcentoj. Tial, post pli ol dekok jarcentoj, ni ĝojas prezenti ĉi eldonon al la esperantlingva publiko.

Ĉi tiu libro estas ero de la serio Oriento-Okcidento de UEA.

Verkoj de Lukiano estas aĉetebla en nia butiko : https://butiko-esperanto-france.org/romans-nouvelles-recits-traductions/1615-verkoj-de-lukiano.html
kaj ankaŭ ĉe https://www.lulu.com/spotlight/esperanto-france

Vidu https://eo.wikipedia.org/wiki/Serio_Oriento-Okcidento por pliaj informoj pri la libro-serio Oriento-Okcidento

Rapport annuel 2024-2025 d'Espéranto-France

2026-05-07T11:28:15Z

Vous pouvez télécharger ci-dessous le rapport d'activité annuel (en espéranto).

Jara raporto 2024-2025 :

Financaj raportoj 2023-2024 kaj 2024-2025 :

Malgraŭ ke ni pli frue laboris pri la financa raporto ol pasintjare, ni konstatas ke ni ne kapablas tute finpretigi la financan raporton kia ĝi devus esti. Ni do montras al vi la financajn raportojn de 2024 kaj 2025 en iliaj nunaj statoj en kiuj vi povos konstati la neceson de kelkaj korektoj, pri kiuj ni daŭre laboros dum la sekvaj semajnoj.

Ni atentigas ke tamen la ĉiutaga kontotenado de la asocio estis bone zorgata de la kasisto, helpe de aliaj bonvolemuloj kaj de Said en la sidejo. Pretigo de la financa raporto estas alia laboro kiu necesus iom pli da helpo. La kasisto iom tro solas en tiu tasko kaj helpo de aliaj homoj estu ege bonvena, ekzemple de kasistoj de partneraj asocioj : federacioj kaj lokaj asocioj. Kun la komuna kotizsistemo la administrado de Esperanto-France fariĝis administrado de preskaŭ 30 diversaj asocioj, helpo do ne nur estas bonvena sed fariĝas nepra por bona funkciado de ĉiuj niaj asocioj.

Kongreso de Esperanto en Francio 2026

2026-01-21T19:04:17Z

La Kongreso de Esperanto en Francio okazos de la 22-a ĝis la 25-a de majo 2026 en Hérouville-Saint-Clair, proksime de Caen en Normandio, nord-okcidente de Francio.

Por pliaj informoj kaj por aliĝi, vizitu la kongresan retejon.

- Eventoj

VOJAĜO

2025-12-06T01:57:45Z

Bicikla vojaĝo trans du kontinentoj, miloj da dokumentoj remalkovritaj post multaj jaroj, kaj la historio de Esperanto en la 1930-aj jaroj.
Ekde la 9-a de decembro ni invitas vin al la ekspozicio VOJAĜO : Biciklado al Azio kun Esperanto (1928-1932) — la rakonto pri la eksterordinara vojaĝo de la juna esperantisto Lucien Péraire kaj la konservado de la heredaĵo de movado, kiu transpasas naciajn kaj kulturajn limojn.

En 1928, Lucien Péraire (1906-1997), juna karpentisto, ekiris por bicikla vojaĝo ĉirkaŭ la mondo — vojaĝo, kiu restas grandparte nekonata ĝis hodiaŭ. Direktante sin orienten tra Eŭropo, Sovetunio, Japanio, Ĉinio kaj poste Sudorienta Azio ĝis Indonezio, Lucien estis pelata de fundamenta kaj tre aktuala demando : kiaj estas la kaŭzoj de militoj kaj malamikeco inter nacioj ?

Dum sia vojaĝo, renkontante milojn da homoj, li observis kaj dokumentis la politikajn, ekonomiajn kaj sociajn realaĵojn de la landoj, kiujn li vizitis. La spuroj de tiu rimarkinda vojaĝo — miloj da dokumentoj inkluzive de vojaĝtaglibroj, stenografiaj notoj, raportoj en la franca kaj la esperanta, fotoj, poŝtkartoj, flagetoj kaj korespondaĵo — estis lastatempe remalkovritaj en la kelo de la asocio Espéranto-France.

La malstabila situacio de ĉi tiu kolekto ilustras unu el la ĉefaj defioj, kiujn alfrontas la esperanta heredaĵo hodiaŭ. Naskiĝinta en Varsovio antaŭ preskaŭ 150 jaroj, la Esperanta movado rapide disvastiĝis al ĉiu kontinento, ĉiu socia medio kaj multaj areoj de homa agado : ne nur por la promocio de la lingvo, sed ankaŭ en literaturo, politiko, religio, scienco kaj multaj aliaj kampoj.

Ĉi tiu transnacia, horizontala kaj tutmonda movado neniam havis universitatojn aŭ bibliotekojn, kiuj povus certigi la konservadon de ĝia heredaĵo. Ĉi tiu escepta heredaĵo nun urĝe riskas malaperi. Kvankam la dokumentaro de Péraire estis savita danke al cifereciga projekto gvidita de la Centro Alexandre Koyré (CNRS, EHESS, MNHN) kaj subtenita de la regiono Île-de-France (pariza regiono) per DIM PAMIR, granda parto de la tutmonda esperanta heredaĵo, precipe en Francio, restas sub minaco.

En 2023, la Biblioteka Narodowa, la Nacia Biblioteko de Pollando, faris decidan paŝon antaŭen, aldonante la Bibliotekon Hodler de la Monda Esperantista Asocio en Roterdamo al siaj kolektoj — pli ol sep tunojn da dokumentoj, kiuj estas nuntempe prilaborataj. La katalogado ĵus komenciĝis, sed la estonteco aspektas promesplena por esplori la riĉecon kaj diversecon de ĉi tiu unika homa sperto.

La ekspozicio VOJAĜO : Biciklado al Azio per Esperanto (1928-1932) prezentas la kolekton Péraire al la publiko unuafoje, proponante zorge elektitan elektaĵon kune kun kolekto de dokumentoj konservataj ĉe la Biblioteka Narodowa. Per ĉirkaŭ 200 originalaj objektoj en tri spacoj, interpunkciitaj de centoj da fotoj, la ekspozicio spuras la evoluon de la esperanta movado ĉirkaŭ 1930 kaj reliefigas la intensecon kaj vivecon de ĝiaj agadoj.

De la 9-a de decembro 2025 ĝis la 31-a de marto 2026. Senpaga eniro, lundo ĝis sabato : 8:30–20:30.

Varsovio, Biblioteka Narodowa, al. Niepodległości 213, metroo : Pole Mokotowskie
Komisaroj : Pascal Dubourg Glatigny, Gabriela Skonieczna
Kunlaboro : Sophie David, Régis Fournier, Agnieszka Mozer, Nicolas Raymond
Grafika dezajno : Goodnews | Waldemar Koralewski, Paulina Wojdyna, Justyna Radziej

https://peraire.huma-num.fr/eo

Mediteranea Esperanto-Semajno 2026

2025-09-15T16:39:13Z

La Mediteranea Esperanto-Semajno 2026 okazos de la 14-a ĝis la 21-a de marto 2026, same kiel lastajn jarojn en la hotelo Miléade en Les Issambres, apud la Mediteranea marbordo en Suda Francio.

Estas nur limigitaj eblecoj partopreni en tiu semajno. Do indas aliĝi rapide !

La semajno inkludos Esperantajn kursojn por tri grupoj kaj kompletan distran programon, kaj ekskurson por profiti la belan veteron de la Lazura Marbordo komence de la printempo.

La semajno komenciĝos sabaton la 16-an de marto je la 16:00 kaj finiĝos sabaton la 21-an de marto je la 11:00.

Kursoj estos gvidataj de elstaraj instruistoj :

kurso 1 (komencparolantoj) : Katalin KOVATS (Nederlando - Hungario)
kurso 2 (paroliga-kleriga kurso pri Esperanto-literaturo) : Pawel FISCHER-KOTOWSKI (Nederlando - Pollando)
kurso 3 (paroliga-kleriga kurso pri mikronoveloj) : Maurizio GIACOMETTO (Britio - Italio)
Pli da detaloj aperas sur la retejo de Esperanto-Provence aŭ vi povas sendi al ni retmesaĝajn demandojn.

Vi povas aliĝi :

rete en https://www.helloasso.com
perpoŝte : bonvolu elŝuti kaj printi la aliĝilon kaj sendu ĝin kompletigan kun via pago al la adreso skribita en la aliĝilo.